काठमाडौं । नेपाल कम्युनिष्ट पार्टी (नेकपा) प्रचण्ड–माधव समूहका अध्यक्ष पुष्पकमल दाहालले जनताको भावनामाथि खेलाची नगर्न सर्वोच्च अदालत र निर्वाचन आयोगलाई चेतावनी दिएका छन् ।
आज बुधबार राजधानीमा आयोजित विरोध सभालाई सम्बोधन गर्ने क्रममा उनले प्रधानमन्त्री केपी ओलीले सत्ताको मातमा निर्वाचन आयोगलाई धम्की दिएको भन्दै त्यसलाई कुनै पनि हालतमा नमान्न पनि चेतावनी दिए ।
दाहालले आफूहरूसँग भएको ७० प्रतिशतको हिसाब नगरी ओलीले भनेको गरे देशले त्यसलाई देख्ने समेत चेतावनी दिए । ‘७० प्रतिशत केन्द्रीय सदस्य एकातिर हुँदाहुँदै हामीले सुरुमै गएर भनेको हो नि केन्द्रीय समिति,’ प्रचण्डको भनाइ छ, ‘हामी हो पार्टी । तीस दिन के दश दिन पनि पुगेको थिएन हामी जाँदा । अनि त्यसलाई हिसाब नगर्ने ? ओलीले गएर धम्क्याउनेबित्तिकै त्यसैलाई हिसाब गर्नुभयो भने तपाईंको खुट्टी पनि देख्छ नेपालले । सजिलो नठान्नु होला । कसैले सजिलो नठाने हुन्छ । नेपाली जनतालाई हेप्ने गल्ती कसैले नगरे हुन्छ ।’
संवैधानिक नियाकायमा पुगेकाहरूले खेलाची गरे देश र जनताले दुःख पाउने उनले चेतावनी समेत दिए ।
दाहालले सर्वोच्च अदालतप्रति पनि टिप्पणी गरे । ‘कतिपले अदालतको अपमान भयो भन्छन्,’ उनले भने, ‘मैले अदालको कहिले पनि अपमान गरेको छैन । मैले भरोसा पनि गरेको छु । मैले भनेको छु, छिटो गर्देउ भनेको छु बरु । गर्ने त्यही हो, छिटो गर । निर्वाचन आयोग पनि खुट्टा नकमाउ । काइते कुराको पछि नलाग मात्रै भन्या न हो हामीले ।’
प्रचण्डले आफ्नो सम्बोधनका क्रममा जीवित मान्छे नै भगवान भएको र अहिले आफूहरु जनताको शरणमा परेको बताए । ‘जीवत मान्छे हाम्रा भगवान हुन्,’ उनले भने, ‘तपाईंको शरणमा हामी छौं । सबै धर्मका आस्थावान जनताप्रति हाम्रो सम्मान छ ।’
तस्वीरः वर्षा शाह
