न्यूयोर्क – समाजसेवा र मानवीय सहयोगको सुन्दर उदाहरण प्रस्तुत गर्दै स्थानीय समुदायका अगुवाहरूले अक्टोबर ८ तारीख संयुक्त रूपमा निःशुल्क भोजन वितरण कार्यक्रम सम्पन्न गरेका छन्।
यो कार्यक्रम पर्साउड कम्युनिटी अफेयर्स प्यान्ट्री इन्कको आयोजनामा र दिल कुमारी केसी स्मृति प्रतिष्ठानका अध्यक्ष नवराज केसीको सहकार्यमा सम्पन्न भएको हो। कार्यक्रममा हामी नेपाली ग्लोबल अमेरिका च्याप्टर, घ्याल्सुम्दो सेवा संस्था अमेरिका, किरात याक्थुङ चुम्लुङ अमेरिका र युनाइटेड किरात राई अर्गनाइजेशन अफ अमेरिका (यूकेआरओए, न्यूयोर्क च्याप्टर) लगायतका संस्थाहरूको सक्रिय सहभागिता रहेको थियो।
कार्यक्रम अन्तर्गत ज्याक्सन हाइट्स, न्यूयोर्क (४०–०८, ७६ स्ट्रीट, ज्याक्सन हाइट्स, एनवाई ११३७७) मा दिउँसो ३:३० देखि ५:३० बजेसम्म निःशुल्क भोजन वितरण गरिएको थियो। सहभागीहरूलाई हेलो फ्रेशका साकाहारी र मासुयुक्त भोजनका साथै ताजा तरकारी र सुख्खा सामग्री वितरण गरिएको आयोजकहरूले जानकारी दिएका छन्।
कार्यक्रममा घ्याल्सुम्दो सेवा संस्था अमेरिकाका अध्यक्ष छिरिङ लामा, हेलो अमेरिकाका सम्पादक तथा निर्देशक सम्राट कार्की, किरात याक्थुङ चुम्लुङ अमेरिकाका अध्यक्ष पुरन लिम्बू र सचिव हरीप्रसाद लिम्बू, हामी नेपाली ग्लोबल अमेरिका च्याप्टरका महासचिव तथा समाजसेवी सूर्य सिम्खडा साथै युनाइटेड किरात राई अर्गनाइजेशन अफ अमेरिका (यूकेआरओए)का केन्द्रीय उपाध्यक्ष तथा हामी नेपाली ग्लोबलका प्रवक्ता केशब राम राई स्वयंसेवक टोलीसहित उपस्थित रहेका थिए।
कार्यक्रममा स्वयंसेवकहरूको उत्साहपूर्ण सहभागिता रहेको थियो। आयोजकहरूले समुदायभित्र सहयोग, दया र एकताको भावना फैलाउने उद्देश्यले यस्ता सेवा कार्यक्रमहरू आगामी दिनहरूमा पनि निरन्तर रूपमा सञ्चालन गर्ने प्रतिबद्धता व्यक्त गरेका छन्।
