लण्डन । गत शनिबारदेखि बेलायती प्रधानमन्त्री निवास नजिक आफ्ना माग पूरा गर्न आमरण अनशन गरिरहेका भूपू गोर्खाहरूको आन्दोलनप्रति बेलायतको प्रमुख प्रतिपक्ष दल लेबर पार्टीले ऐक्यबद्धता जनाएको छ ।
विपक्षी लेबर पार्टीले बोरिस जोनसन नेतृत्वको वर्तमान सरकारलाई ब्रिटिस आर्मीसँगै जोडिएर लडेका गोर्खाहरूलाई दिँदै आएको असमान पेन्सन अपमानजनक रहेको र यसको अन्त्य गर्न भनेको छ । पार्टीका छायाँ रक्षामन्त्री स्टेफन मोर्गनले परराष्ट्र सचिवलाई यसअघि नै पत्र लेखेर असमान पेन्सनका बारेमा तत्काल कदम चाल्न भनिसकेको बताए ।
बुधबार स्थानीय सञ्चारमाध्यममा लेबर पार्टीका सांसद मोर्गनले भने, “गोर्खाहरूले २०० वर्ष हाम्रो देशमा सेवा गरेका कारण हाल उठाइएको मुद्दामा हाम्रो चासो र चिन्ता रहेको छ, सरकारले यो अपमानजनक कार्य अन्त्य गर्ने कुरा दुई वर्षअघि नै गरे पनि हालसम्म हुन सकेको छैन, अब यो अपमानजनक कार्य तत्काल अन्त्य हुनुपर्छ, हामी गोर्खाहरूको पक्षमा छौँ ।” उनले तीन गोर्खाले न्यायका लागि मर्न तयार रहेको भनिरहँदा बेलायतको इतिहासमा यो घटनालाई सन्सार सामु अलोकप्रिय बनाउने छ ।
अनशनरत मध्येका एक धन गुरुङले भने, “हाम्रो पुर्खाले यो देश बचाउन प्राण आहुति गरे, अब हामीले न्यायका लागि प्राण त्याग्न तयार हुनुपरेको छ ।”
यसै सन्दर्भमा रक्षा मन्त्रालयका प्रवक्ताले बेलायती सेनामा गरेको ठूलो योगदानको मूल्याङ्कन गरेर गोर्खाहरूको उपचार र पेन्सनको व्यवस्था गरेको तथा बेलायतको पेन्सन प्रावधानलाई ध्यानमा राखी उचित र न्यायोचित पेन्सन वितरण गर्न प्रतिबद्ध रहेको बताएका छन् ।
२१ जुलाईबाट १३ भिसीहरुको नाममा १७ दिने रिले अनशन बसेका गोर्खालीहरुको माग सम्बोधन नगरिएपछि गत शनिवारदेखि ज्ञानराज राई, धन गुरुङ र पुष्पा घलेले भोक अनशन शुरू गरेका छन् ।
१९९७ अघि बेलायतको लागि लडेका गोर्खालीहरुलाई बेलायत नागरिकले पाउने सरह नै पेन्सन पाउनुपर्ने लगायतका मागहरु राख्दै उनीहरुले बर्षौदेखि आन्दोलन गरिरहेका छन । जबकि बेलायती नागरिक र गोर्खा सैनिकहरुबीच झन्डै ९० प्रतिसतले सेवा सुबिधामा विभेद छ । बेलायतको तर्फबाट खासगरि लडाईको भिभिन्न काल खण्डहरुमा होमिएका पुर्व सैनिक र तीनका परिवार धेरै मरिसके, जति बाँचेका छन अत्यन्तै कष्टकर र गरिबीको रेखामुनी बाँच्न बिवश छन ।
